دل ہائے گناہوں سے بیزار نہیں ہوتا

Dil haaye gunahon se bezaar nahin hota

Maghloob shaha! nafs-e-badkaar nahin hota

Shaitaan musallat hai afsos! kisi soorat

Ab sabr gunahon par sarkar nahin hota

Ae Rabb ke habeeb aao! ae mere tabeeb aao

Achha yeh gunahon ka beemar nahin hota

Go laakh karun koshish islaah nahin hoti

Pakeeza gunahon se kirdaar nahin hota

Yeh saans ki maala ab bas tootne wali hai

Ae dil kyun magar ab bhi bedaar nahin hota

Sunnat ki taraf logo tum kyun nahin aa jaate

Kyun sard gunahon ka bazaar nahin hota

Sarkar ka aashiq bhi kya daadhi mundaata hai!

Kyun ishq ka chehre se izhaar nahin hota

Aaqa ki ita'at se jee apna churaate hain

Jo, aison se khush Rabb-e-Ghaffaar nahin hota

Jeene ka maza us ko milta hi nahin jis ka

Dil ishq-e-Muhammad se sarshaar nahin hota

Jo yaad-e-Madina mein din raat tadapte hain

Door un se Madine ka darbar nahin hota

Maghmoom hai gham jis ko Aaqa ka nahin milta

Beemar hai jo un ka beemar nahin hota

Khushiyon mein musarrat mein aasaish-o-raahat mein

Israar-e-muhabbat ka izhaar nahin hota

Woh ishq-e-haqeeqi ki lazzat nahin paa sakta

Jo ranj-o-moseebat se do chaar nahin hota

Ae zaair-e-Taybah! tu dam tod de chaukhat par

Deedaar, Madine ka har baar nahin hota

Kaun aisi kare jur'at keh sakta nahin aaqil

Sarkar ka deewana hushiyaar nahin hota

Aa jaaye Madine mein le jaaye zara si khaak

Jo theek kisi soorat beemar nahin hota

Ae saailo! aa jaao aur jholiyan phailao

Darbar-e-Risaalat se inkaar nahin hota

Woh bahr-e-sakhaawat hain woh qaasim-e-ne'mat hain

Taybah ka gada hargiz naadaar nahin hota

Dunya mein bhi thanda hai uqba mein bhi thanda hai

Jo un ka hai deewana woh khaar nahin hota

Dunya mein bhi jalta hai uqba mein bhi jalta hai

Main kaise kahun munkir fin-naar nahin hota

Chhodo ae farishto woh, aate hain shafa'at ko

Woh jis ke bhi haami hain fin-naar nahin hota

Afsos nidamat bhi isyan pe nahin hoti

Neki ki taraf maa'il Attar nahin hota

Aaqa ka gada ho kar Attar tu ghabraye

Ghabraye wahi jis ka ghamkhwaar nahin hota