رستہ بھی کٹھن دھوپ میں شدت بھی بہت تھی
Rasta bhi Kathin Dhup Men Shiddat bhi Bahut Thi
رستہ بھی کٹھن دھوپ میں شدت بھی بہت تھی
سائے سے مگر اس کو محبت بھی بہت تھی
خیمے نہ کوئی میرے مسافر کے جلائے
زخمی تھا بہت پاؤں مسافت بھی بہت تھی
سب دوست مرے منتظر پردۂ شب تھے
دن میں تو سفر کرنے میں دقت بھی بہت تھی
بارش کی دعاؤں میں نمی آنکھ کی مل جائے
جذبے کی کبھی اتنی رفاقت بھی بہت تھی
کچھ تو ترے موسم ہی مجھے راس کم آئے
اور کچھ مری مٹی میں بغاوت بھی بہت تھی
پھولوں کا بکھرنا تو مقدر ہی تھا لیکن
کچھ اس میں ہواؤں کی سیاست بھی بہت تھی
وہ بھی سر مقتل ہے کہ سچ جس کا تھا شاہد
اور واقف احوال عدالت بھی بہت تھی
اس ترک رفاقت پہ پریشاں تو ہوں لیکن
اب تک کے ترے ساتھ پہ حیرت بھی بہت تھی
خوش آئے تجھے شہر منافق کی امیری
ہم لوگوں کو سچ کہنے کی عادت بھی بہت تھی
rasta bhi kaThin, dhoop meiN shiddat bhi bohat thi
saaye se magar us ko mohabbat bhi bohat thi
kheme na koi mere musaafir ke jalaaye
zakhmi tha bohat paaoN musaafat bhi bohat thi
sab dost mre muntazir-e-parda-e-shab the
din meiN to safar karne meiN diqqat bhi bohat thi
barrish ki duaaoN meiN nami aaNkhi ki mil jaaye
jazbe ki kabhi itni rafaaqat bhi bohat thi
kuchchh to tere mausam hi mujhe raas kam aaye
aur kuchchh mri miTTi meiN baghaawat bhi bohat thi
phooloN ka bikharna to muqaddar hi tha lekin
kuchchh is meiN hawaaoN ki siyaasat bhi bohat thi
is tark-e-rafaaqat pe pareshaaN to hooN lekin
ab tak ke tere saath pe hairat bhi bohat thi
khush aaye tujhe shehr-e-munaafiq ki ameeri
hum logoN ko sach kehne ki aadat bhi bohat thi
پروین شاکر
پروین شاکر (24 نومبر 1952ء – 26 دسمبر 1994ء) اردو ادب کی صفِ اول کی عظیم شاعرہ، ادیبہ اور معلمہ تھیں۔ ان کا تعلق پاکستان سے تھا۔ پروین شاکر کو نسائی احساسات اور نازک جذبوں...