رام

Labraiz Hai Sharab-e-Haqiqat Se Jam-e-Hind

Sub Falsafi Hain Khita-e-Maghrib Ke Raam-e-Hind

Ye Hindiyon Ke Fikr-e-Falak Ras Ka Hai Asar

Riffat Mein Asman Se Bhi Uncha Hai Baam-e-Hind

Iss Dais Mein Huwe Hain Hazaron Malak Sarasht

Mashoor Jin Ke Dam Se Hai Dunya Mein Naam-e-Hind

Hai Raam Ke Wujood Pe Hindustan Ko Naaz

Ahl-e-Nazar Samajhte Hain Uss Ko Imam-e-Hind

Ejaz Uss Charagh-e-Hadayat Ka Hai Yehi

Roshan Tar Az Sehar Hai Zamane Mein Sham-e-Hind

Talwar Ka Dhani Tha, Shujaat Mein Fard Tha

Pakeezgi Mein, Josh-e-Mohabbat Mein Fard Tha