لازم تھا کہ دیکھو مرا رستا کوئی دن اور
Lazim Tha ke Dekho Mera Rasta Koi Din aur
لازم تھا کہ دیکھو مرا رستا کوئی دن اور
تنہا گئے کیوں اب رہو تنہا کوئی دن اور
مٹ جائے گا سر گر ترا پتھر نہ گھسے گا
ہوں در پہ ترے ناصیہ فرسا کوئی دن اور
آئے ہو کل اور آج ہی کہتے ہو کہ جاؤں
مانا کہ ہمیشہ نہیں اچھا کوئی دن اور
جاتے ہوئے کہتے ہو قیامت کو ملیں گے
کیا خوب قیامت کا ہے گویا کوئی دن اور
ہاں اے فلک پیر جواں تھا ابھی عارف
کیا تیرا بگڑتا جو نہ مرتا کوئی دن اور
تم ماہ شب چار دہم تھے مرے گھر کے
پھر کیوں نہ رہا گھر کا وہ نقشا کوئی دن اور
تم کون سے تھے ایسے کھرے داد و ستد کے
کرتا ملک الموت تقاضا کوئی دن اور
مجھ سے تمہیں نفرت سہی نیر سے لڑائی
بچوں کا بھی دیکھا نہ تماشا کوئی دن اور
گزری نہ بہ ہر حال یہ مدت خوش و ناخوش
کرنا تھا جواں مرگ گزارا کوئی دن اور
ناداں ہو جو کہتے ہو کہ کیوں جیتے ہیں غالبؔ
قسمت میں ہے مرنے کی تمنا کوئی دن اور
Lazim tha ke dekho mera rasta koi din aur
Tanha gaye kyun ab raho tanha koi din aur
Mit jaye ga sar gar tera patthar na ghise ga
Hoon dar pe tere nasiya-farsa koi din aur
Aaye ho kal aur aaj hi kehte ho ke jaon
Mana ke hamesha nahin achha koi din aur
Jate hue kehte ho qayamat ko milen ge
Kya khoob qayamat ka hai goya koi din aur
Han ae falak pir-e-jawan tha abhi Arif
Kya tera bigarta jo na marta koi din aur
Tum mah-e-shab-e-char-dahum the mere ghar ke
Phir kyun na raha ghar ka woh naqsha koi din aur
Tum kaun se the aise khare dad-o-sitad ke
Karta malak-ul-maut taqaza koi din aur
Mujh se tumhein nafrat sahi Mir se laraai
Bachon ka bhi dekha na tamasha koi din aur
Guzri na ba-har-haal yeh muddat khush-o-na-khush
Karna tha jawan-marg guzara koi din aur
Nadan ho jo kehte ho ke kyun jeete hain Ghalib
Qismat mein hai marne ki tamanna koi din aur
مرزا غالب
مرزا اسد اللہ خان غالب (27 دسمبر 1797ء – 15 فروری 1869ء) اردو اور فارسی زبان کے سب سے بڑے، سب سے زیادہ پڑھے جانے والے اور عہد ساز کلاسیکی شاعر اور نثری ادیب تھے۔...