خطاب بہ جوانان اسلام

Khatab Ba Jawanan-e-Islam

Address To The Muslim Youth

Kabhi Ae Naujawan Muslim, Tadabbur Bhi Kiya Tu Ne

Woh Kya Gardoon Tha Tu Jis Ka Hai Ek Toota Huwa Tara

Tujhe Iss Qoum Ne Pala Hai Aghosh-e-Muhabbat Mein

Kuchal Dala Tha Jis Ne Paon Mein Taj-e-Sar-e-Dara

Tamaddun Afreen, Khallaq-e-Aaeen-e-Jahandari

Woh Sehra-e-Arab Yani Shutar-Banon Ka Gehwara

Sama ‘Al-Faqru Fakhri’ Ka Raha Shan-e-Amarat Mein

Baab-o-Rang-o-Khal-o-Khat Che Hajat Rooye Zaibara

Gadai Mein Bhi Woh Allah Wale The Ghayoor Itne

Ke Mun’em Ko Gada Ke Dar Se Bakhshish Ka Na Tha Yara

Gharz Main Kya Kahun Tujh Se Ke Woh Sehra Nasheen Kya The

Jahangeer-o-Jahan Dar-o-Jahan Baan-o-Jahan Aara

Agar Chahon To Naqsha Khainch Kar Alfaz Mein Rakh Dun

Magar Tere Takhiyyul Se Se Fazoon Tar Hai Woh Nazara

Tujhe Aaba Se Apne Koi Nisbat Ho Nahin Sakti

Ke Tu Guftar Woh Kirdar, Tu Sabit Woh Sayyara

Ganwa Di Hum Ne Jo Aslaf Se Meeras Payi Thi

Surreya Se Zameen Par Asman Ne Hum Ko De Mara

Hukumat Ka To Kya Rona Ke Woh Ek Aarzi Shay Thi

Nahin Dunya Ke Aaeen-e-Musallam Se Koi Chara

Magar Woh Ilm Ke Moti, Kitabain Apne Aaba Ki

Jo Dekhain In Ko Yourap Mein Tou Dil Hota Hai Seepara

Ghani Rouz-e-Siyah-e-Peer-e-Kanaan Ra Tamasha Kun

Ke Noor-e-Didah Ash Roshan Kunan Chashm-e-Zulekhara