آپ کے نام پر

Pyara pyara hai naam aap ka

Dono aalam fida aap ke naam par

Ishq ki ibtida aap ke naam se

Husn ki intiha aap ke naam par

Aql se maawara hai maqaam aap ka

Aasra gham ke maaron ka naam aap ka

Izzatein azmatein jannatein rahmatein

Haq ne sab kuch diya aap ke naam par

Aap ka naam lay kar ae jaan-e-jahaan

Baad-e-rahmat chali khul uthe gulistaan

Raqs mein hai fiza wajd mein hai saba

Jhoomti hai hawa aap ke naam par

Aap hi ke liye bazm-e-aalam saji

Aap hain sab zamane ke data sakhi

Laaj rakh leejiye kuch na kuch deejiye

Maangte hain gada aap ke naam par

Sar se mushkil talay aap ke naam se

Sab ka daaman bharay aap ke naam se

Yeh to tasleem raaziq hai sab ka Khuda

Par hai deta Khuda aap ke naam par

Laakh toofaan hon aamada sarkashi

Aandhiyan bhi hazaron chalein zor ki

Woh yaqeenan bhanwar se nikal aaye ga

Jo safeena chala aap ke naam par

Aap ka naam naami hai mushkil-kushaa

Aap ka naam hai har alam ki dawa

Mera Saim salaam aap ki zaat par

Main ne sab kuch liya aap ke naam par