یا خدا! حج پہ بُلا آکے میں کعبہ دیکھوں

Ya Khuda! hajj pe bula aake main Kaaba dekhoon

Kaash! ik baar main phir meetha Madina dekhoon

Phir muyassar ho mujhe kaash! wuqoof-e-Arafat

Jalwa main Muzdalifa aur Mina ka dekhoon

Jhoom kar khoob karoon Khaana-e-Kaaba ka tawaaf

Phir Madine ko chaloon Gumbad-e-Khizra dekhoon

Sabz gumbad ka haseen jalwa dikha de Ya Rab

Masjid-e-Nabawi ka pur-noor minaara dekhoon

Rauza-e-Paak ke saaye mein bula kar Aaqa

Aankh de deejiye main aap ka jalwa dekhoon

Choom loon kaash! nigahon se sunehri jaali

Ashkbaar aankh se mimbar ka bhi jalwa dekhoon

Kaash! woh aankh milay ke main Madine aakar

Jis taraf jaaoon udhar noor barasta dekhoon

Jaam-e-ishq aisa pila deejiye jaan-e-aalam

Har ghari aahain bharoon khud ko tarapta dekhoon

Chashm-e-tar soz-e-jigar deejiye qalb-e-muztar

Ishq mein rota rahoon jab bhi main rauza dekhoon

Sozish-e-ishq mein jalta hi rahoon main har dam

Aankh se gham mein teray khoon barasta dekhoon

Is pe rashk aata hai aur pyaar bohat aata hai

Ishq mein teray jisay rota bilakta dekhoon

Kaash! main ronay lagoon qalb bhi ho mera udaas

Jab Madine ki taraf qaafila jaata dekhoon

Zaairo! kehna yeh ro ro ke Shaha! ik miskeen

Keh raha tha yeh tarap kar "Main Madina dekhoon"

Tu jo chaahay to meri aankh se parday uthain

Main watan se bhi Madine ka nazaara dekhoon

Woh khilaatay hain pilaatay hain nibhaatay bhi hain

Kyun kahin jaaoon kisi aur taraf kya dekhoon

Apni rehmat se mujhe kar do ata aisi bahaar

Munh kabhi bhi na khizaan ka mere Aaqa dekhoon

Teray ehsaan karoron hain ho yeh bhi ehsaan

Ya Khuda naza'a mein jalwa main Nabi ka dekhoon

Baagh-e-jannat mein jiwaar apna ata farma kar

Khuld mein har ghari jalwa main tumhara dekhoon

Daur kar qadmon mein Attar giroon main us dam

Hashr mein jis ghari Sarkar ko aata dekhoon