سرگزشت آدم

Sune koi meri gurbat ki daastan mujh se

Bhulaaya qissa-e-paiman-e-awwaleen mein ne

Lagi na meri tabiat riyaz-e-jannat mein

Piya shauur ka jab jaam-e-aatishi mein ne

Rahi haqeeqat-e-aalam ki justuju mujh ko

Dikhaya ooj-e-khayaal-e-falak-nasheen mein ne

Mila mizaaj-e-taghayur-pasand kuch aisa

Kiya qarar na zer-e-falak kahin mein ne

Nikala Kaabe se patthar ki moortoon ko kabhi

Kabhi buton ko banaya harm-nasheen mein ne

Kabhi mein zauq-e-takallum mein Toor par pohcha

Chhupaaya noor-e-azle zer-e-aasteen mein ne

Kabhi saleeb pe apno ne mujh ko latkaaya

Kiya falak ko safar chhod kar zameen mein ne

Kabhi mein ghar-e-heera mein chhupa raha barson

Diya jahan ko kabhi jaam-e-aakhiri mein ne

Sunaaya Hind mein aakar surood-e-rabbani

Pasand ki kabhi Yunan ki sarzamin mein ne

Deyar-e-Hind ne jis dam meri sada na suni

Basaya khitta-e-Japan o mulk-e-Chin mein ne

Banaya zarron ki tareekib se kabhi aalam

Khilaf-e-ma’ni-e-taleem-e-ahl-e-deen mein ne

Lahu se laal kiya saikdon zameenon ko

Jahan mein chhed ke paikar-e-aql-o-deen mein ne

Samajh mein aayi haqeeqat na jab sitaaron ki

Isi khayaal mein raatein guzar deen mein ne

Dara sakin na kaleesa ki mujh ko talwarein

Sikhaya masla-e-gardish-e-zameen mein ne

Kashish ka raaz huwaida kiya zamane par

Laga ke aaina-e-aql-e-door-been mein ne

Kiya aseer shuaon ko barq-e-muztar ko

Bana di ghairat-e-jannat ye sarzamin mein ne

Magar khabar na mili aah raaz-e-hasti ki

Kiya khird se jahan ko teh-e-nagin mein ne

Hui jo chashm-e-mazahir-parast wa aakhir

To paaya khana-e-dil mein use makin mein ne