کیسے آئے

Kaisay aaye usay kapaas pasand

Ho jisay reshmi libaas pasand

Koi aisi bahu nahi dekhi

Jis ko aayi ho apni saas pasand

Jo lagaata nahi usay makkhan

Us ko karta nahi hai baas pasand

Bor nikli hain woh kutub jin ke

Hum ko aaye thay iqtibaas pasand

Wisl ka chance fifty-fifty hai

Yaarab ke mila hai toss pasand

Umar bhar hum rahay shakar-khoray

Umar bhar woh rahay khataas pasand

Kho gayi hai kaheen giraani mein

Thi hamein jo middle class pasand

Main tabassum-farosh hoon Shahid

Log mujh ko nahi udaas pasand