بجٹ

Budget mein ne dekhay hain saaray teray

Anokhay anokhay khasaaray teray

Allah tallay udhaaray teray

Bhala kaun qarzay utaaray teray

Giraani ki saughaat hasil mera

Mahasil teray goshwaray teray

Mashiron ka jhamghat salamat rahay

Bohat kaam jis ne sanwaaray teray

Meri saada-lohi samajhti nahi

Hisaabi kitaabi ishaaray teray

Kai istilahaon mein gondhay huay

Kinayay teray istiaaray teray

Tu arbon ki kharbon ki baatein karay

Adad kaun itnay shumaaray teray

Tujhe kuch ghareebon ki parwa nahi

Waderay hain pyaaray dulaaray teray

Udhar se liya kuch udhar se liya

Yunhi chal rahay hain idaaray teray