شہنشاہ بغداد یا غوث اعظم

Shehenshah-e-Baghdad Ya Ghaus-e-Azam

Suno meri faryad Ya Ghaus-e-Azam

Bula lijiye Baghdad Ya Ghaus-e-Azam

Sunani hai roodad Ya Ghaus-e-Azam

Laga kar mujhe apne qadmon se murshid

Mera dil karo shaad Ya Ghaus-e-Azam

Tere paak jalwon se ya peer-o-murshid

Mera dil ho aabaad Ya Ghaus-e-Azam

Pila jaam aisa hua tere Aaqa

Na kuchh bhi rahe yaad Ya Ghaus-e-Azam

Mere qalb se hubb-e-dunya ki murshid

Ukhar jaaye bunyaad Ya Ghaus-e-Azam

Rahe mujh pe meethi nazar murshidi gar

Pare kuchh na uftaad Ya Ghaus-e-Azam

Tere hote ya peer! ranj-o-alam ki

Karoon kis se faryad Ya Ghaus-e-Azam

Tere dar ke mangta sab aghwaas-o-aqtaab

Aur abdaal-o-awtaad Ya Ghaus-e-Azam

Mu'azzam shaha tere saare ke saare

Hain aaba-o-ajdaad Ya Ghaus-e-Azam

Shehenshah! kaash! dar ka bana leti kutta

Mujhe teri aulaad Ya Ghaus-e-Azam

Rahein shaad-o-aabaad do aalam mein mere

Sabhi ghar ke afraad Ya Ghaus-e-Azam

Mujhe pyaare gyarah-o-baarah-o-pachees

Ke lagte hain a'adaad Ya Ghaus-e-Azam

Adoo qatl karne ke darpe hua hai

Madad Shah-e-Baghdad Ya Ghaus-e-Azam

Adoo to mukhalif the pehle hi se ab

Barha zor-e-hussaad Ya Ghaus-e-Azam

Gunahon ne mujh ko kahin ka na chhora

Na ho jaaoon barbaad Ya Ghaus-e-Azam

Mujhe nafs-e-zaalim pe kar deeje ghaalib

Ho na-kaam hamzaad Ya Ghaus-e-Azam

Dam-e-naza deedar ki bheek dena

Chale jaan meri shaad Ya Ghaus-e-Azam

Giraftaar-e-ranj-o-bala hai yeh Attar

Karo aa kar aazaad Ya Ghaus-e-Azam

“Yeh Attar mera hai” murshid khudaara

Suna do yeh irshaad Ya Ghaus-e-Azam