میٹھا مدینہ آگیا

Bil-yaqeen is ko to jeene ka qareena aa gaya

Jis ke lab pe har ghadi zikr-e-Madina aa gaya

Saahil-e-Jaddah pe lo apna safeena aa gaya

Jhoom jaao aashiqo! meetha Madina aa gaya

Khoob machlo jhoom lo aur khaak uttha kar choom lo

Lo woh Makka aa gaya dekho Madina aa gaya

Gham ghalat ho jaayeinge bas muskura ke dekh lo!

Gham ka maara dar pe ya Shah-e-Madina aa gaya

Paaon mein joota arrey! Mehboob ka koocha hai yeh

Hosh kar tu hosh kar ghaafil! Madina aa gaya

Hijr ke maaron ke dil mein hook si utthne lagi

Qaafile Taybah chale Hajj ka maheena aa gaya

Mujh ko rota chhod kar sab qaafile waale chale

Laut kar main ghamzada, Shah-e-Madina aa gaya

Mauj har biphri hui hai ab Khudara aaiye!

Gardish-e-toofaan mein apna safeena aa gaya

Kis qadar hai ba-muqaddar woh Musalman bhaiyo!

Khwab mein jis ko nazar Shah-e-Madina aa gaya

Ik tabassum-reez honton ki jhalak dikhlaaiye

Jaan ba-lab ke ab to maathe par paseena aa gaya

Tal gaya mujh se azaab aur qabr raushan ho gayi

Qabr mein meri Shahanshah-e-Madina aa gaya

Shafe'-e-mahshar! meri imdaad ko ab aaiye!

Hashr mein baar-e-gunah le kar kameena aa gaya

Kyun karein na rashk us pe yeh jahan ke taajdaar

Haath jis ke ishq-e-Ahmad ka khazeena aa gaya

Arz ro ro kar karoonga jab Madine jaaoonga

Ya Nabi dar par gunahgaar-o-kameena aa gaya

Aap ke lutf-o-karam se keh utthe Attar kaash!

Dil Madina ho gaya, dil mein Madina aa gaya