طلوع اسلام

Daleel-e-subah-e-roshan hai sitaron ki tunk-tabi

Ufaq se aftab ubhra, gaya dour-e-garan khawabi

Urooq-e-murda-e-mashriq mein khoon-e-zindagi doura

Samajh sakte Nahin iss raaz ko seena-o-farabi

Musalman ko musalman kar diya toofan-e-maghrib nay

Talatum haye darya hee se hai gohar ki seerabi

Atta momin ko phir dargah-e-haq se honay wala hai

Shikoh-e-Turkamani, zehn Hindi, nutq Arabi

Asar kuch khawab ka ghunchon mein baqi hai tou ae bulbul

Nava-ra talkh-tarmi zan chu zauq-e-naghma kam-yabi

Tarap sehan-e-chaman mein, aashiyan mein, shakh-saron mein

Juda paare se ho sakti nahin taqdir-e-seemabi

Woh chashm-e-Pak hain kyun zeenat-e-bar-gustawan dekhay

Nazar aati hai jis ko mard-e-ghazi ki jigar-tabi

Zameer-e-lala mein roshan charagh-e-aarzoo kar de

Chaman kay zarre zarre ko Shaheed-e-justujoo kar de

Sarishk-e-chashm-e-Muslim mein hai naisan ka asar paida

Khalil-Allah (A.S.) ke darya mein hon gay phir guhar paida

Kitab-e-millat-e-baiza ki phir shiraza-bandi hai

Yeh shakh-e-Hashmi karne ko hai phir barg-o-bar paida

Rubood aan turk sheerazi dil Tabraiz-o-kabil ra

Saba karti hai bu-e-gul se apna hamsafar paida

Agar Usmaniyon par koh-e-gham toota tou kya gham hai

Ke khoon-e-sad-hazar-anjum se hoti hai sahar paida

Jahan baani se hai dushwar-tar kar-e-jahan-bini

Jigar khoon ho to chashm-e-dil mein hoti hai nazar paida

Hazaron saal Nargis apni be-noori pe roti hai

Bari mushkil se hota hai chaman mein dida-war paida

Nawa pera ho aae bulbul ke ho tere taranum se

Kabootar ke tan-e-nazuk mein shaheen ka jigar paida

Tere seene mein hai poshida raaz-e-zindagi keh de

Musalman se hadees-e-soz-o-saaz-e-zindagi keh de

Khuda-e-lam-yazal ka dast-e-qzudrat tu, zuban tu hai

Yaqeen paida kar aae ghafil, ke maghloob-e-guman tu hai

Pare hai charkh-e-nili fam se manzil Musalman ki

Sitare jis ki gard-e-rah hon, woh karwan tu hai

Makan faani, makeen faani, azal tera, abad tera

Khuda ka akhiri pegham hai tu, javedan tu hai

Hina-band-e-uroos-e-lala hai khoon-e-jigar tera

Teri nisbat barahimi hai, memar-e-jahan tu hai

Teri fitrat ameen hai mumkanat-e-zindagani ki

Jahan ke johar-e-muzmar ka goya imtehan tu hai

Jahan-e-aab-o-gil se alam-e-javed ki khatir

Nabuwat sath kis ko le gayi woh armaghan tu hai

Ye nukta sargazhat-e-millat-e-baiza se hai paida

Ke aqwam-e-zameen-e-Asia ka pasban tu hai

Sabaq phir parh sadaqat ka, adalat ka, shujaat ka

Liya jaye ga tujh se kaam dunya ki imamat ka

Yehi maqsud-e-fitrat hai, yehi ramz-e-muslamani

Akhuwat ki jahangiri, mohabat ki farawani

Butan-e-rang-o-khoon ko torr kar millat mein gum ho ja

Na Turani rahe baqi, na Irani, na Afghani

Miyan-e-shakh-saran sohbat-e-murgh-e-chaman kab tak

Tere baazu mein hai parwaz-e-shaheen-e-qahasatani

Guman-abad hasti mein yaqeen mard-e-musalman ka

Byaban ki shab-e-tareek mein qindil-e-rohbani

Mitaya qaisar o kisra ke istibdad ko jis ne

Woh kya tha, zor-e-Haider (R.A.), faqr-e-Bu’dhar (R.A.), sidq-e-Salmani (R.A.)

Huway ahrar-e-millat jada-paima kis tajammul se

Tamasha-i shagaaf-e-dar se hain sadiyon ke zindani

Sabat-e-zindagi iman-e-muhkam se hai duniya mein

Kah almani se bhi pa.enda-tar nikla hai turani

Jab iss angara-e-khaki mein hota hai yaqeen paida

To kar leta hai ye bal-o-par-e-ruh-ul-ameen paida

Ghulami mein na kaam aati hain shamsheerain na tadbeerain

Jo ho zauq-e-yaqeen paida to kat jati hain zanjeerain

Koi andaza kar sakta hai uss ke zor-e-bazu ka

Nigah-e-mard-e-momin se badal jati hain taqdeerain

Vilayat, padshahi, ilm-e-ashiya ki jahangiri

Ye sub kya hain, faqat aik nukta-e-iman ki tafseerain

Barahimi nazar paida magar mushkil se hoti hai

Hawas chup chup ke seenon mein bana leti hai tasweerain

Tameez-e-banda-o-aaqa fasad-e-admiyat hai

Hazar aae cheerah dastan, Sakht hain fitrat ki taazirain

Haqiqat aik hai har shay ki, khaki ho ke noori ho

Lahu khurshid ka tapke agar zarre ka dil chirein

Yaqin mohkam, amal paiham, mohabbat fateh-e-alam

Jihad-e-zindagani mein hain ye mardon ki shamshirain

Che bayad mard ra tab-e-bulanday, mashrab-e-naabay

Dil-e-garme, nigah-e-pak binay, jaan-e-betabay

Uqabi shan se jhapte the jo, be-bal-o-par nikle

Sitare sham ke khoon-e-shafaq mein doob kar nikle

Huway madfun-e-darya zair-e-darya tairne wale

Tamanche mouj ke khate the jo, ban kar guhar nikle

Ghubar-e-rahguzar hain, kimiya par naaz tha jin ko

Jabinain khak par rakhte the jo, iksir-gar nikle

Hamara naram-rau qasid payam-e-zindagi laaya

Khabar deti theen jin ko bijliyan woh be-khabar nikle

Haram ruswa huwa peer-e-haram ki kam-nigahi se

Jawanan-e-tatari kis qadar sahib-nazar nikle

Zameen se nuryan-e-asman parwaz kehte the

Ye khaki zinda-tar, paenda-tar, tabinda-tar nikle

Jahan mein ahl-e-iman surat-e-khurshid jeetay hain

Idhar doobe, udhar nikle, udhar doobe, idhar nikle

Yaqeen afraad ka sarmaya-e-tameer-e-millat hai

Yehi quwwat hai jo surat gar-e-taqdeer-e-millat hai

Tu raz-e-kun fakan hai, apni ankhon par ayaan ho ja

Khudi ka raz-dan ho ja, khuda ka tarjuman ho ja

Hawas ne kar diya hai tukre tukre nau-e-insan ko

Akhuwat ka byan ho ja, mohabbat ki zaban ho ja

Yeh hindi, woh khurasani, yeh afghani, woh turani

Tu ae sharminda-e-sahil, uchhal kar be-karan ho ja

Ghubar-aluda-e-rang-o-nasab hain bal-o-par tere

Tu ae murgh-e-haram, urne se pehle par-fishan ho ja

Khudi mein doob ja ghafil, yeh sir-e-zindagani hai

Nikl kar halqa-e-shaam-o-sahar se javedan ho ja

Masaf-e-zindagi mein sirat-e-foulad paida kar

Shabistan-e-mohabbat mein harair-o-parniyan ho ja

Guzar ja ban ke sail-e-tund-e-rau koh-o-bayaban se

Gulistan raah mein aye to ju-e-naghma-khawan ho ja

Tere ilm-o-mohabbat ki nahin hai inteha koi

Nahin hai tujh se barh kar saaz-e-fitrat mein nawa koi

Abhi tak admi said-e-zabun-e-shehryari hai

Qayamat hai ke insan nau-e-insan ka shikari hai

Nazar ko khirah karti hai chamak tehzib-e-hazir ki

Ye sanna.i magar jhoote nigun ki reza-kari hai

Woh hikmat naaz tha jis par khirad-mandan-e-maghrib ko

Hawas ke panja-e-khunin mein tegh-e-kar-zari hai

Tadabbur ki fusun-kari se mohkam ho nahin sakta

Jahan mein jis tamaddun ki bina sarmaya-dari hai

Amal se zindagi banti hai jannat bhi, jahanum bhi

Ye khaki apni fitrat mein na noori hai na naari hai

Kharosh-amoz bulbul ho, girah ghunche ki wa kar de

Ke tu is gulistan ke waste bad-e-bahari hai

Phir uthi Asia ke dil se changari mohabbat ki

Zameen jaulan-geh-e-atlas qabayan-e-tatari hai

Phir uthi Asia ke dil se changari mohabbat ki

Zameen jaulan-geh-e-atlas qabayan-e-tatari hai

Baya paida kharida raast jan-e-na-tavan-e-ra

pas az muddat guzar uftad barma karwame ra

Baya saqi nava-e-murgh-e-zaar az shakh-sar aamad

Bahar aamad nigar aamad, nigar aamad qirar aamad

Kashid abr-e-bahari khema andar waadi-o-sahra

Sada-e-absharan az faraz-e-koh-sar aamad

Sarat gardam toham qanun-e-paishin saaz dah saaqi

Ke khail-e-naghma pardazan qatar andar qatar aamad

Kanar az zahidan bar-gir o bebakana saghar-kash

Pas az muddat aziin shakh-e-kuhan bang-e-hazar aamad

Ba-mushtaqan hadees-e-khawajah (s.a.w.)-e-badar o hunain aawar

Tasarruf ha-e-pinhanash ba-chashm-e-ashkar aamad

Digar shakh-e-khalil (a.s.) az khoon-e-ma namnak mi gardad

Ba-bazar-e-mohabbat naqd-e-ma kamil ayyar aamad

Sar-e-khak-shahire barg-ha-e-lala mi pasham

Ke khunash ba-nihal-e-millat ma saazgar aamad

Baya ta-gul ba-afmaishanim o mai dar saghar andazem

Falak ra saqf ba-shagafem o tarh-e-digar andazem