کلی

Jab Dikhati Hai Sehar Ariz-e-Rangeen Apna

Khol Deti Hai Kali Seena-e-Zarren Apna

Jalwa Ashaam Haiye Subah Ke Mai Khane Mein

Zindagi Iss Ki Hai Khursheed Ke Pemane Mein

Samne Mehr Ke Dil Cheer Ke Rakh Deti Hai

Kis Qadar Seena Shagafi Ke Maze Leti Hai

Mere Khusheed! Kabhi Tu Bhi Utha Apni Naqab

Beher-e-Nazara Tarapti Hai Nigah-e-Betaab

Tere Jalwe Ka Nasheman Ho Mere Seene Mein

Aks Abad Ho Tera Mere Aaeene Mein

Zindagi Ho Tera Nazara Mere Dil Ke Liye

Roshni Ho Teri Gehwara Mere Dil Ke Liye

Zarra Zarra Ho Mera Phir Tarb Andoz-e-Hayat

Ho Ayan Johar-e-Andesha Mein Phir Souz-e-Hayat

Apne Khursheed Ka Nazara Karun Door Se Mein

Sifat-e-Guncha Hum Agosh Rahun Noor Se Mein

Jaan-e-Muztar Ki Haqiqat Ko Namayan Kar Doon

Dil Ke Poshida Khiyalon Ko Bhi Uryan Kar Doon