ڈاکٹر صاحب

Doctor sahab mujhe pehchanay main kaun hoon

Aap ki khidmat se pehle ik tha ab paun hoon

Haaye woh shaamat ka din jab cheenk aayi thi mujhe

Aur shifa khanay ki jaanib kheench laayi thi mujhe

Aap ne us cheenk ko cheenka bana kar rakh diya

Apna aala mere seenay par jama kar rakh diya

Dil ki dharkan sun ke yun maghmoon-o-afsurda thay aap

Jaisay sun baithay hon Izraeel ke qadmon ki chaap

Phir hamaray bazuaon mein roz injection ki dhaar

Tablet ik din mein chh aur capsule ik din mein chaar

Sab dawain aap ke store se letay thay hum

Aap ki aaram-deh chamkeeli motor ki qasam

Yun na kartay to dawain hum ko deta aur kaun

Nuskha-fahmi ke liye karta phir itna ghaur kaun

Jis ne dekha aap ka nuskha woh yun goya huwa

Naqsh-e-faryaadi hai kis ki shokhi-e-tehreer ka

Kyun na chamkay is tarah do-tarfa dhanda aap ka

Gardan-e-beemar mein fit hai jo phanda aap ka

Is tarah mehangi dawaon ka akhaara haaye haaye

Us pe par-hezi ghizaon ne pachaara haaye haaye

Al-gharz yunhi maheeno hum dawa kartay rahay

Aur ba-qadr-e-zarf ghar walay hawa khatay rahay

Murgh machhli doodh makkhan kino kela aur saib

Un ki yurish par duhai de rahi thi apni jaib

Soorat-e-haalat yun hum par sitam dhaalti rahi

Hum sinha khatay rahay hum ko ghiza khati rahi

Aakhir ik din tang aa kar chorh baithay hum ilaaj

Rafta rafta normal honay laga apna mizaj

Aap ne to kar hi daala tha mujhe khwaar-o-zaboon

Aap ke baare mein aagay aur kya kuch main kahoon