بلال

Likha Hai Aik Maghrabi Haq Shanas Ne

Ahl-e-Qalam Mein Jis Ka Bohat Ehtram Tha

Joulan Gah-e-Sikandar-e-Rumi Tha Asia

Gardoon Se Bhi Buland Tar Uss Ka Maqam Tha

Tareekh Keh Rahi Hai Ke Rumi Ke Samne

Dawa Kiya Jo Poras-o-Dara Ne, Khaam Tha

Dunya Ke Uss Shahenshah-o-Anjum Sipah Ko

Hairat Se Dekhta Falak-e-Neel Faam Tha

Aaj Asia Mein Uss Ko Koi Janta Nahin

Tareekh Daan Bhi Use Pehchanta Nahin

Lekin Bilal (R.A.), Woh Habshi Zada Haqeer

Fitrat Thi Jis Ki Noor-e-Nabuwwat Se Mustaneer

Jis Ka Amen Azal Se Huwa Seena-e-Bilal (R.A.)

Mehkoom Uss Sada Ke Hain Shahanshah-o-Faqeer

Hota Hai Jis Se Aswad-o-Ahmar Mein Ikhtilaat

Karti Hai Jo Ghareeb Ko Hum Pehlu-e-Ameer

Hai Taza Aaj Tak Woh Nawa-e-Jigar Gudaz

Sadiyon Se Sun Raha Hai Jise Gosh-e-Charakh-e-Peer

Iqbal! Kis Ke Ishq Ka Ye Faiz-e-Aam Hai

Rumi Fana Huwa, Habshi Ko Dawam Hai