جب سونیا گاندھی اپنے شوہر کو سیاست میں آنے سے روکنے کے لیے ’شیرنی کی طرح لڑ گئیں‘

اٹلی کے ایک چھوٹے سے گاؤں سے دنیا کے سب سے زیادہ آبادی والے ملک انڈیا کے ایوانِ اقتدار کے مرکز تک پہنچنے والی سونیا گاندھی ایک ایسے سیاسی خاندان کی سربراہ بنیں جس نے آزاد انڈیا کی تاریخ کے بیشتر حصے پر گہرے اثرات مرتب کیے۔

اب 79 سالہ سونیا گاندھی، جو اپنی نجی زندگی کو ہمیشہ پردے میں رکھنے کے لیے مشہور رہی ہیں، اپنی یادداشتوں پر مبنی کتاب ’Belonging: A Journey of Love‘ شائع کرنے جا رہی ہیں۔

اس کتاب میں انہوں نے اپنی زندگی کا احوال بیان کیا ہے، جسے ان کے بقول ’محبت، فرض، جدائی اور اپنی جگہ تلاش کرنے‘ کے تجربات نے تشکیل دیا۔

یہ کتاب منگل کو شائع ہو رہی ہے، ایک ایسے وقت میں جب وہ کانگریس پارٹی، جس کی وہ کبھی سربراہ رہ چکی ہیں، دوبارہ سیاسی میدان میں اپنی جگہ بنانے کی کوشش کر رہی ہے۔

انڈپینڈنٹ اردو کا واٹس ایپ گروپ یہاں جوائن کریں

ان کے بیٹے راہل گاندھی بھی وزیراعظم نریندر مودی کی ہندو قوم پرست حکومت کے خلاف نوجوانوں کی قیادت میں ہونے والے احتجاجی مظاہروں کے بعد ایک بار پھر سیاسی منظرنامے پر نمایاں ہو رہے ہیں۔

1946 میں ایک اطالوی کیتھولک خاندان میں پیدا ہونے والی سونیا کے غیر ملکی پس منظر کو انڈیا کے قوم پرست حلقے اکثر تنقید کا نشانہ بناتے رہے ہیں۔

ان کا بچپن شمالی اٹلی کے شہر تورین کے قریب ایک عام سے ماحول میں گزرا۔ 1965 میں ان کی ملاقات راجیو گاندھی سے اس وقت ہوئی جب وہ انگریزی زبان کی تعلیم حاصل کر رہی تھیں۔

انڈیا کے وزیراعظم راجیو گاندھی اپنی اہلیہ سونیا کے ہمراہ 20 دسمبر، 1988 کو مشہور دیوار چین کا دورہ کرتے ہوئے (روئٹرز)