’فری فلسطین‘ کے نعرے لگانے پر میک لمور، ایڈ شیرن کے امریکی دورے سے باہر

امریکی ریپر میک لمور کو فلسطین کے حق میں بیانات دینے کے بعد گلوکار ایڈ شیرن کے امریکی دورے کے باقی شوز سے ہٹا دیا گیا ہے۔

ایڈ شیرن کے امریکی ’لوپ ٹور‘ کے منتظمین کے مطابق آنے والے شوز کے مقامات نے واضح کیا تھا کہ اگر میک لمور پروگرام کا حصہ رہے تو وہ کنسرٹ کی اجازت نہیں دیں گے، جس سے پورا دورہ منسوخ ہونے اور لاکھوں مداحوں کے متاثر ہونے کا خدشہ تھا۔

شو پروموٹر میسینا ٹورنگ گروپ نے ’رولنگ سٹون‘ کو بتایا کہ متعلقہ فریقوں سے بات چیت کے بعد میک لمور کو باقی شوز میں پرفارم نہ کرنے کا فیصلہ کیا گیا۔

میک لمور نے انسٹاگرام پر ردعمل دیتے ہوئے کہا کہ انہیں سمجھ نہیں آ رہا تھا کہ اس خبر کے بعد کیا کہیں، اس لیے وہ ’دل کی بات اور سچ‘ بیان کریں گے۔