الکاراز یو ایس اوپن ٹائٹل کے دفاع سے قبل ’100 فیصد‘ فٹ

کارلوس الکاراز نے کہا ہے کہ یو ایس اوپن میں اپنے ٹائٹل کے دفاع سے قبل وہ خود کو ’100 فیصد‘ فٹ محسوس کر رہے ہیں، تاہم انہوں نے اعتراف کیا کہ کلائی کی انجری کے باعث چار ماہ تک کھیل سے دور رہنے کے بعد وہ بے چینی محسوس کر رہے ہیں۔

ہسپانوی کھلاڑی نے کہا کہ گرینڈ سلم سے قبل سخت پریکٹس سیشنز نے ان کا اعتماد بحال کیا ہے۔

انہوں نے پری ٹورنامنٹ میڈیا ڈے پر صحافیوں سے کہا: ’مجھے یہاں آ کر ان کھلاڑیوں کے ساتھ پریکٹس کرنے کی ضرورت تھی تاکہ میں دوبارہ مقابلے کا احساس حاصل کر سکوں، اور یہ واقعی ایک کڑا امتحان ہے۔‘

انہوں نے کہا: ’میں بہت اچھا محسوس کر رہا ہوں اور … اس نے مجھے یہ جاننے میں بہت مدد دی ہے کہ اس وقت سب کچھ صرف میرے ذہن میں ہے۔‘

23 سالہ الکاراز، جو جنوری میں آسٹریلیا میں کامیابی حاصل کرنے کے بعد کیریئر گرینڈ سلام جیتنے والے کم عمر ترین کھلاڑی بنے، 16 اپریل کے بعد سے سنگلز نہیں کھیلے۔ وہ دائیں کلائی کی انجری کے باعث بارسلونا اوپن سے دستبردار ہو گئے تھے اور بعد میں فرانسیسی اوپن اور ومبلڈن دونوں میں شرکت نہیں کی۔

الکاراز نے، جنہوں نے منگل کو یو ایس اوپن کے مکسڈ ڈبلز ایونٹ میں سرینا ولیمز کے ساتھ شراکت کی، جمعے کو صحافیوں کو بتایا کہ ان کی کوچنگ اور معاونت کرنے والی ٹیم کو مکمل یقین ہے کہ وہ مقابلے کے لیے تیار ہیں۔

انہوں نے کہا: ’مجھے اپنے لوگوں پر بھروسہ کرنا ہوگا جو مجھے بتاتے ہیں کہ سب ٹھیک ہو جائے گا۔ اس لیے مجھے صرف 100 فیصد دینا ہے۔ میں بس اس خوف سے دور رہنے کی کوشش کر رہا ہوں۔‘

کارلوس الکاراز 12 مارچ 2026 کو انڈین ویلز، کیلیفورنیا میں انڈین ویلز ٹینس گارڈن میں بی این پی پریباس اوپن کے کوارٹر فائنل میچ میں برطانیہ کے کیمرون نوری کے خلاف فورہینڈ کھیل رہے ہیں (کلائیو برنسکل / اے ایف پی)