ہے یہ دل کی صدا یا نبی یا نبی
ہو عطا پر عطا یا نبی یانبی
جس گھڑی روح تن سے جدا ہو میری
ہو وظیفہ میرا یانبی یا نبی
آپ ہی بخشوائیں گے محشر کے دن
ہوں بھلا یا بُرا یا نبی یانبی
آئیں جس دم فِرِشتے میری قبر میں
ہو لبوں پہ ثنا یا نبی یا نبی
مصطفٰےﷺکا اگر چاہتے ہو کرم
مل کے کہہ دو ذرا یا نبی یا نبی
رَدّ کبھی نہ دعا ہو گی اس شخص کی
دے گا جو واسطہ یا نبی یا نبی
اس معینِ حزیں پہ کرم کیجیے
دَر گزر ہو خطا یا نبی یا نبی